– Eg vart ringt opp av dottera mi, som fortalde at dei hadde gøymd seg i skogen, fortel mora til ein av tre barna som torsdag kveld skal ha blitt lokka av ein mann på skuleplassen ved Tveit skole på Askøy.
Ifølge avisa Askøyværingen skjedde det i 20.00-tida. Ein mann med lang frakk og hette dukka opp og skal ha bedt barna om å komme bort til han. Etter at dottera hadde ringt, heiv mora seg i bilen for å hente dei.
– Ho sa at mannen framleis ropa på dei. Då eg kom fram så såg eg han ikkje.
Politiet undersøkjer saka
Mora valde å melde saka til politiet, og seier til Askøyværingen at ho i samråd med andre foreldre bestemte seg for å også varsle andre og be om tips på Facebook. Åtvaringa er delt av fleire hundre på under eit døgn.
- LES OGSÅ:
Også på Ågotnes er politiet på leit etter ein mogleg lokkemann. Etter skuletid onsdag skal ein mann ha forsøkt å lokka ein gut i barneskulealder bort til bilen sin. Politiet seier det er for tidleg å slå fast om det er noko samanheng mellom dei to sakene.
– Dei to forholda liknar på kvarandre, men det er for tidleg å seie. Vi undersøkjer saka nærare, seier politioverbetjent Thomas Sørensen ved Sotra, Askøy og Øygarden lensmannsdistrikt.
Får fleire meldingar i året
Sørensen forklarar at politiet får meldingar om denne type episodar fleire gongar i året.
– Det er ikkje alltid det er grunnlag for å sei at nokon har forsøkt å gjera noko straffbart. Så no arbeider vi med å få klarlagt kva som har skjedd her. Vi samlar inn informasjon og etter kvart håpar vi å få kontakt med personen og høyre kva det er som har skjedd, avsluttar Sørensen.
