No kan du finne fram skia

Alt neste helg kan det vere mogeleg å finne fram skia i nokre av anlegga om vêrgudane spelar på lag.

Framleis er det tynt med snø nedst i anlegga, men med kaldt ver dei neste dagane vil ivrige skientusiastar kunne ta anlegga i bruk.

– Me driv no mei dei siste testkøyringane av heisane og trakkemaskinane har alt vore oppe i fjella, seier leiar John Ivar Norheim i Myrkdalen Fjellheisar.

Hard kamp

Skianlegga i Hordaland kjempar ein hard kamp for å få nettopp deg til fjells og investerer stadig i nytt utstyr og nye løyper.

I Myrkdalen opnar ein ny stolheis og fire nye løyper i desember.

– I praksis betyr det at vi nesten doblar kapasiteten, seier John Ivar Norheim.

Konkurrenten Voss Resort opnar og ei ny familieløype på kunstsnø og aukar og produksjonen av snø med 50 prosent. Før hadde dei 20 snøkanonar. No får dei 10 nye.

Puddervarsel

Dei har og småtriks på lur for å lokke folk til løypene.

– Vi innfører puddervarsel der folk via eit webkamera og ein målestav sjølv kan gå inn å sjekke kor mange centimeter med nysnø som har falt det siste døgeret, seier dagleg leiar Jan Einar Thorsen.

Eikedalen skisenter ligg heller ikkje på latsida. Der kan dei by på oppgraderte heisar, ladestasjonar for elbilar og ny trakkemaskin.

Ny trakkemaskin kjem og i Furedalen. Dessutan er ei ny lysløype på plass til sesongen. Her kan no og tilby brukarane 4G tilgang i løypene.

Gratis internett i bakken

I Røldal lokkar dei med gratis trådløst internett i heile bakken til jul og vil neste sesong også opne store nye områder for skikøyring samt ein ny heis.

Alt i alt så merkast den harde konkurransen godt. Ein konkurranse med ein klar vinnar, nemleg deg som skal på ski i vinter ...