Simon Johnsen fekk tittelen Young European Wildlife Photographer of the Year 2017 i Lünen i Tyskland førre veke.
– Det er jo kjekt, det. Det har vore eit bra år for meg, seier Johnsen til Hardanger Folkeblad.
Vann med bilete av nasjonalfuglen
17-åringen er oppvaksen på Austlandet, men bur no på Oksenhalvøya i Hardanger.
Den gjeve prisen vert kvart år delt ut av tyske GDT, og Johnsen er svært stolt.
– Det kjennest veldig bra. Det er stort å oppnå dette, seier han til NRK.
Medan han til dagleg utdannar seg til anleggsgartnar, har Johnsen vore ein aktiv naturfotograf sidan han starta å ta bilete i 2013.
Fotografiet som til slutt gjorde at han vann konkurransen var ein del av eit prosjekt han har hatt dette året.
– Det er av ein fossekall. Eg er fascinert av korleis desse sporvefuglane livnærer seg av fisk og insekt som dei finn i vatnet. Eg har leita lenge, men til slutt fann eg eit reir, fortel han.
Jobbar i nærmiljøet
17-åringen likar best å ta bilete av fuglar og dyr, og konsentrerer seg gjerne om ein art om gongen.
– I haustferien jobba meg med å få bilete av sporvehauk. Då hadde eg fri, så då var eg ute ti timar i strekk, fortel han.
Og sjølv om han brukar mykje tid på hobbyen sin, dreg han ikkje langt for å fotografere.
– Eg jobbar i nærmiljøet og viser fram naturen som er tett på oss. Naturen utanfor stovedøra er like eksotisk som på andre sida av verda. Og så er det jo meir miljøvennleg å arbeide på denne måten, seier han.
Norsk dommar i juryen
Den norske naturfotografen Audun Rikardsen sat i juryen. Han seier til Hardanger Folkeblad at Johnsen er eit stort talent.
– Simon er veldig fokusert og gjer det bra. Han har lært seg kunsten på eigehand og gjer alt frå grunnen.
Rikardsen trur det kan vere ein fordel å ta bilete på den måten Johnsen har gjort.
– Når ein jobbar lokalt, kjenner ein området. Og er du på rett stad til rett tid, blir det ofte både betre og annleis, seier han til avisa.