Ein 34 år gamal mann vart søndag arrestert og sikta for valdtekt av to kvinner i 20-åra.
Ifølge BA er dei to kvinnene søstrer. Mannen vart arrestert søndag føremiddag heime hjå dei.
– Han er sikta for valdtekt av to kvinner, seier politiadvokat Trond Eide i Hordaland politidistrikt til BA.
Dei påståtte valdtektene skal ha skjedd i ein av Bergens omegnskommunar same dag som han vart arrestert.
– Sjokkert
Mannen skal ha hatt eit månadslangt forhold til den yngste av søstrene, og skal ha vore på helgebesøk i leilegheita til vedkommande.
Mannens forsvarar, advokat Helene Elness, seier at han nektar straffskuld.
– Han stiller seg heilt uforståande til siktinga og er heilt sjokkert. Han var på besøk og kjenner seg overhovudet ikkje att i skuldingane. Dette er heilt uforståeleg for han, seier Elness til NRK.
Melder for falsk forklaring
Tysdag ettermiddag vart 34-åringen framstilt for varetektsfengsling i Nordhordland tingrett.
Tingretten lauslét mannen, skriv BA. Men aktor anka, og 34-åringen blir sitjande i varetekt til Gulating lagmannsrett har behandla saka.
No varslar forsvarar Elness at dei vil melde dei to kvinnene for falsk forklaring. 34-åringen seier han har vore i intim kontakt med den eine kvinna, og hatt frivillig sex med den andre.
– Det er ikkje vanskeleg å tenkje seg eit motiv for å skulde han for valdtekt. Når to søstrer har intim kontakt med same mann i same leilegheit, seier det seg sjølv, hevdar Elness overfor BA.