Dette er alt som er att av Eirik sin Lamborghini

– Det er berre oske igjen, konstaterer Eirik Kråkevik til Bergensavisen.

Den faglege leiaren ved Fyllingsdalen trafikkskole i Bergen fekk tysdag ettermiddag ein lei telefon på ferie i Spania.

Skulen sin Lamborghini Gallardo (2004-modell) stod nemleg parkert i garasjeanlegget som tok fyr i Hetlevikåsen i Loddefjord tysdag.

På bileta som NRK har tatt frå brannruinane kan ein tydeleg sjå dei to sportsseta og nakkestøtta på millionbilen, fullstendig utbrent i den brannråka garasjen.

1,2 millionar kroner opp i røyk

Eit større bustadområde ved Hetlevikåsen vart evakuert då det var fare for at to gassflasker i garasjeanlegget skulle eksplodera.

Ein skarpskyttar frå politiet skaut hol på flaskene og brannen vart meldt sløkt i 18-tida. Totalt var det fire bilar og ti garasjeplassar som gjekk tapt i brannen.

Kråkevik fortel til BA at hans Lamborghini er ein amerikansk modell og har ein prislapp på 1,2 millionar kroner.

– Det er trist. Bilen har ekstrem verdi, ikkje berre i kroner og øre, men den byrja å nærme seg eit samleobjekt. Den har også reklameverdi for trafikkskulen og emosjonell verdi. Det aller, aller viktigaste er at det brann ein stad der det ikkje er folk.

Ville bruke bilen i opplæring

Avisa har tidlegare skrive om Lamborghinien som Kråkevik har fått spesialmontert med eit ekstra pedalsett.

Han ville nytta den til lærekøyring på trafikkskulen, men regelverket sette ein stoppar for den draumen.

Før den vart forvandla til aske i går kveld, vart millionbilen nytta til premietur for elevar som bestod førarprøven.

Kråkevik har forsikring på bilen. Til NRK seier han at det kan bli aktuelt å kjøpe ny.

– Har ein først køyrd og eigd Lamborghini, er det ikkje nokon anna sportsbil som tel!

Kvifor det byrja å brenne i garasjeanlegget i går er framleis uvisst. Politiet vil starta sine undersøkingar på staden så raskt ruinane er kjølt ned.