Bremnes til topps i Norway Cup

– No er det full jubel i garderoben. Stemninga er høg. Gutane har jobba hardt for dette, seier trenar Kenneth Nesse.

Laget frå Bremnes på Bømlo klatra laurdag heilt til topps i ein av verdas største fotballturneringar.

I A-finalen møtte dei Værdalen, og kampen enda 3–0.

– Me gjekk inn til finalen med så gode bein som ein kan drøyma om etter ei hard veke med så mange kampar. Me var der me ville vera. Me klarte å variera og er strålande fornøgde med kampen, seier Nesse.

Dei vann semifinalen fredag kveld 5–0 over israelske Eshkol.

Har hatt finalen som mål

– Me har hatt dette som eit mini-prosjekt frå i haust. Me har mobilisert og trent godt. Målet var å komma til finalen, seier Nesse.

Han innrømmer at det var ei letting når dommaren blåste i fløyta etter to fullspelte omgangar.

– Me var kanskje litt tøffe i trynet før turneringa. Me la lista høgt for oss sjølve, så det var ei letting at me faktisk klarte det.

Feiring på Bømlo

Nesse fortel at fleire hundre bømlingar følgde kampen frå tribunen, og var med på å heia dei fram til siger.

– Det var kjempestemning under kampen.

• Les også: Inviterer flyktningbarn til Norway Cup

For gutelaget ber det tilbake til Vestlandet i føremiddag,

– No er det ned på skulen og pakka, før me hoppar rett i bussen og reiser tilbake til Bømlo, seier Nesse.

Sjølv om dei forlèt Oslo og Ekebergsletta, skal triumfen feirast.

– Rykta går om at dei heime steller i stand fest til me kjem tilbake. Så det blir veldig kjekt.