I dag kom kronprinsesse Mette-Marit til Festplassen i Bergen for å setja fokus på gjenbruk. Fretex arrangerer nemleg Gjenbruksdagane for å inspirere til meir miljøvennleg val av klede.
Kronprinsessa var aktiv med og deltok i dei ulike aktivitetane på Festplassen. Ho viste kva ein kan gjera med «second hand» og re-design.
– Ho er med å skapa ei positiv merksemd for vårt arbeid og miljø, seier Arnt-Willy Hjelle i Fretex.
– Me trur at det er mange som enno ikkje veit kva vi gjer, og ho kan vere med å få opplyse om arbeidet og kor viktig det er å drive med gjenbruk.
(Artikkelen held fram under biletet)
Kastar sju kilo plagg kvart år
Kvar nordmann kastar i gjennomsnitt sju kilo med klede i året. Halvparten av desse kleda er fullt brukbare, fortel Logistikk- og produksjonssjef Arnt-Willy Hjelle hos Fretex.
Hjelle trur det er fleire grunnar til at vi kastar så mykje klede, men spesielt ei årsak er at folk ikkje trur kleda dei vil bli kvitt er gode nok til gjenbruk.
– Grunnen kan vere at folk trur kleda ikkje er gode nok, seier Hjelle.
– Kva tenkjer du om dette?
– Det er veldig synd. I alle fall med tanke på at det er ofte veldig høg kvalitet på det som blir kasta. Det er ting vi absolutt kunne brukt om igjen, seier Hjelle.
LES OGSÅ:
Kan levere kle på posten
Hjelle trur folk kastar kle av gammal vane.
– Folk gjer det som er enklast der og då og difor berre kastar kleda. Eller kanskje dei ikkje finn innsamlingscontainerane vi har.
Fretex har difor fått i gang eit nytt konsept for å gjere det enklare for folk å levere tekstil.
– Då kan folk levere inn tøy på posthuset eller hos post i butikk. Dette gjer vi så det skal vere lettare å vite kor ein kan levere. I tillegg prøver vi å auke mengda av kledecontainerar rundt omkring i landet, seier Hjelle.
LES OGSÅ: