Nordmenn stiller seg i kø for å få ein grøn flekk der dei kan dyrke eigne grønsaker, bær og urter.
Fenomenet med urbant landbruk er i vinden som aldri før. I dei parsellhagane som allereie finst både i Bergen og Oslo, er det lange ventelister.
Difor har byrådet i Bergen no sendt ein fersk handlingsplan for landbruk ut på høyring. Målet er at Bergen skal bli mellom landets beste på urbant landbruk.
– God kjensle
I Oslo står over 1200 personar i kø for å få tilgang til ein av dei 22 dei etablerte hagane som finst.
Ei av dei som allereie har ein slik grøn flekk, er Sabine Haake i Bergen.
– Her har vi ripsbukser, rabarbra, i tillegg til krydder, som vi er veldig glad i.
På Kanonhaugen på Landås finst det 16 parsellar der folk kan dyrka fram ingrediensar til middagsbordet sjølv.
– Mange er blitt langt meir bevisste på kva dei et. Ein annan ting er at ein rett og slett blir glad når ein har henda i jorda og ser at ting veks til. Til og med ting som du kan eta. Det blir ein lukkeleg av.
På Landås i Bergen ligg denne flotte parsellhagen. Ventelistene på denne og andre parsellhagar i landet er lange.
Foto: Marthe Njåstad / NRKVore utan plan i mange år
Byråd for klima, kultur og næring, Julie Andersland (V), ynskjer å legga til rette for at fleire skal få den opplevinga som Haake har fått.
Målet er ei bybilete med fleire grøne tak, areal og parsellhagar.
– Vi treng ein berekraftig by, med kortare transportavstandar og fortetting. Då må vi også tenkje på å ha område tilgjengeleg for hagebruk og landbruk.
I mange år har kommunen stått utan ein handlingsplan for landbruket, og Andersland ser fram til å få innspel til planen som er ute på høyring.
– Det er viktig å vidareføra kunnskap om dyrking og at folk får dyrka sine egne grønsaker. Urbant landbruk er også bra for lufta i tillegg til at innbyggjarane får areal til rekreasjon.
PÅ HØYRING: Byråd for klima, kultur og næring, Julie Andersland (V) har sendt ut ein handlingsplan for landbruk i Bergen på høyring. Ein slik plan har ikkje byen hatt på mange år.
Foto: Sølve Rydland / NRKØnskjer urbant landbruk velkommen
Leiar Bodil Fjelltveit i Bondelaget i Bergen, ønskjer ein handlingsplan hjarteleg velkommen.
– Vi som er bønder er avhengige av at forbrukarane veit kva vi gjer på, og ser verdien av det. Det er klart at urbant landbruk er med å bidreg på akkurat den biten.
Fjelltveit meiner det er nok jord å ta av i Bergen, og viser til at handlingsplanen seier at kommunen har sju prosent dyrka mark. På landsbasis er det same talet tre prosent.
– Ein treng ikkje gå langt utanfor bykjerne før ein finn små grøne flekkar som i dag ligg brakk, men som kunne vore nytta til parsellar.
