Normal

Her får knivofferet hjelp av medpassasjeren

Ein 33 år gamal mann er alvorleg skadd etter at han blei stukken med kniv på Bybanen i Bergen. Politiet leiter etter gjerningsmannen.

Knivstikking på Bybanen på Wergeland

FÅR HJELP: Her får knivofferet hjelp av ein medpassasjer til å stoppe blødninga inne på Bybanen på stoppet på Wergeland.

Foto: Eivind Pettersen / NRK

Kring klokka 18 rykka politiet ut til bybanestoppet på Wergeland i Bergen.

knivstikking wergeland

WERGELAND: Mannen blei teken hand om av ambulansepersonell på bybanestoppet på Wergeland.

Foto: Christine Kongsvik / NRK

– Me har fått melding om at det skal ligge ein person som blør på Bybanen ved Wergeland. Han skal ha blitt trua eller stukken med kniv, sa operasjonsleiar Arve Samsonsen.

Den 33 år gamle mannen blei funnen på bybanestoppet og køyrt i ambulanse til sjukehus.

– Han skal ha blitt knivstukken i hovudet, men var bevisst, sa operasjonsleiaren.

Går gjennom overvåkingsbilete

Knivstikking Wergeland

STUKKEN I HOVUDET: Mannen i 30-åra blei stukken med kniv i hovudet, men skal ha vore bevisst då han blei henta av ambulanse.

Foto: Christine Kongsvik / NRK

Bybanevogna der knivstikkinga skjedde er konfiskert og ute av drift. Politiet søker tysdag kveld framleis etter gjerningsmannen.

– Han skal ha gått av Bybanen ved Brann Stadion og stukke av til fots. Me har fått ein skildring av mannen, seier Samsonsen.

Vitne til hendinga vert tysdag kveld avhøyrt av politiet, og politiet går også gjennom overvåkingsbilete frå Bybanen.

Klokka 23 har politiet framleis ikkje pågripe nokon for knivstikkinga.