Full pott i kategorien «Bygg» gjorde at Sjur Elvatun, Tormod Kristoffersen og Daniel Hatland frå Granvin barne- og ungdomsskule klatra til åtte poeng i Klassequizen.
I kategoriane «Pengar» og «Røver» stoppa hardingane på to av fire rette. Krevande og vanskelege spørsmål, konkluderte dei tre elevane etterpå.
– Skulle hatt eitt poeng til!
– Me gjorde det beste me kunne, og eg syns me gjorde det bra totalt sett, seier Sjur Elvatun.
– Vi skulle hatt eitt poeng til, syns Daniel Hatland.
Og det har han heilt rett i. Eitt poeng til ville tatt Granvin opp på delt 1. plass, saman med bergensskulane Ytrebygda og Hop.
Quiz kvar onsdag
Konkurransen går føre seg i radiosendingene til NRK Hordaland onsdagar. Og mandag og onsdag i fem veker etter nyttår. I morgonsendingene kan du få med deg konkurransen mellom klokka 8.30 og 9.00. Når den første skulen har gitt sine svar, går turen vidare til neste skule og 12 nye spørsmål der. Dette blir gjort i opptak, som så blir sendt i ettermiddagsendinga på radio.
Finalen på TV
Dei to skulene med høgast poengsum går vidare til fylkesfinalen i februar. Vinnaren stikk av med ein premie på 5000 kroner til klassekassa si, og dei får spandert på seg tur og opphold til landsfinalen som blir send på NRK1 (TV) lørdag 11. mai 2013.