Mange har lagt seg til livsfarlege snarvegar over jernbanespor rundt omkring i landet. På Gjøvikbanen seier lokomotivførarane rett ut at dei er livredde for å køyre nokon i hel.
– Ein må vere merksam på at folk spring over toglinja. Men eg prøver å ikkje tenkje for mykje på det, da blir dagen uoverkommeleg, sa lokomotivførar Leif Asbjørn Seegaard til nrk.no tidlegare i år.
Problemet har vore særleg gale på Raufoss i Vestre Toten, der det dagleg blir klyppt hòl i gjerdet rundt jernbaneskinnene.
Vil melde til politiet
Berre sidan nyttår har det vorte rapportert om nærmare 1200 nestenulykker ved norske jernbanelinjer.
– Ved eit av tilfella klarte ein lokførar så vidt å stoppe framfor to fireåringar som sat på sporet. Da måtte lokføraren ut og fjerne ungane før han kom vidare, fortel Harry Korslund i Jernbaneverket.
Nå fortel han at dei utan unntak vil melde alle slike ulovlege sporkryssingar til politiet.
– Alle som gjer slikt bør tenkje på at det dagen etter kan vere eit lite barn som går gjennom det same hòlet og blir treft av toget, seier Harry Korslund i Jernbaneverket.