– Så mykje natur, så mykje plass og så få folk, seier Christina Steffes frå Tyskland som vi møter i fjellet mellom Gudbrandsdalen og Jotunheimen. Ho legg strålande til at ho kjenner seg nesten åleine i fjellet.
123 gjestar til 87 senger
Men åleine kan ein knappast seie at ho er. For aldri før har overnattingsstadene hatt meir besøk. Ifølgje NHO Reiseliv er det for tredje året rekordsommar i fjellet.
Ved Wadahl Høgfjellshotell på Gålå kan hotelldirektør Trygve Grov smile breitt.
– Her har det vore "all time high" i år, seier han. Frå mai til no har det vore nær 25 prosent auka belegg på hotellet når han jamfører med same tida i fjor.
Også turisthytta Skogadalsbøen i Sogn og Fjordane merkar pågangen i fjellet. Dei har hatt stappfull hytte i natt, seier Trine Marie Johansen. Hytta skiltar med 87 sengeplassar, men i natt var det 123 gjester.
Ei ringjerunde til turiststader på Beitostølen, Rondane og Jotunheimen gjev same svar; folk vil til fjells.
Billegare i Noreg
Nokre av grunnane er truleg svakare norske kroner saman med terrorfrykt og internasjonal uro
Ifølgje NHO Reiseliv ligg det an til turistrekord i fjellet for tredje år på rad.
Tyske Christina Steffes er i følgje med turistar frå heimlandet og Nederland. Dei har akkurat tatt pause, og turistvertane kjem med etterlengta forsyningar.
– Eg kunne ikkje tenke meg å feriere i Tyrkia eller andre stader i Europa no, seier ho.
Turistvert Knut Lyng i Gålå Booking, seier turistane kjem til Skandinavia på grunn av uro og terroråtak i sørlegare strøk. Lyng meiner også at ei svekka norsk krone gjer det billegare å feriere i Noreg i år.
– Aldri så gale at det ikkje er godt for noko, avrundar han med glimt i auga.