Debatten om kva som skal skje med det omstridte kunstverket i Kvam held fram. Sist veke vart det tatt ned av tryggleiksmessige omsyn etter at nokon gjorde hærverk mot det.
Les også:
Så tok ei gruppe lokale næringslivsfolk i Kvam til orde for å setje det opp igjen, men då helst på ein annan stad enn der det stod fyrste gongen.
Les også:
No vil kunstnarane bak prosjektet setje det opp igjen, men berre på same staden som det fyrst stod.
– Det er jo eit stadsspesifikt verk, og det vi jobbar med er ein fontenestruktur på akkurat denne staden, seier Eystein Talleraas som er ein av kunstnararne bak det halvferdige kunstverket.
– Så for oss er det heilt sentralt at det er denne staden det handlar om.
Ikkje tida for krav
Det uferdige kunstverket har fått tittelen «European Exchange», og er eitt av ni kunstverk i Vegskille-prosjektet til Oppland Fylkeskommune. Til no har kunstverket kosta 400 000 offentlege kroner fordelt på stat, fylkeskommune og kommune. Då Nord-Fron kommune tok det ned sist veke sa ordførar Rune Støstad i Nord-Fron at kunstverket ikkje var sikra godt nok. Derfor måtte det ned.
No er ordføraren langt i frå sikker på at det er ein god idè å setje kunstverket opp på same staden som det først stod:
–Det som er viktig no er at vi kjem i dialog om å finne ei ei god løysing for alle. Det gjer vi best gjennom å innvolvere folk i Kvam og forankre prosjektet i lokalsamfunnet.
Han trur ikkje det er lurt av kunstnarane å insistere på den same lokaliseringa.
– Dette er ikkje tida for å stille krav, seier Støstad.
Elefanten i rommet
I går arrangerte Oppland Fylkeskommune det dei kalla sluttkonferanse for Vegskille-prosjektet. Ingen av ordførarane i dei fem involverte gudbrandsdalskommunane tok seg tid til å stille i konferanserommet på Vinstra, der fylkesbyråkratar og kunstnarar stort sett sa seg nøgde med eigen innsats.
Men Eystein Talleraas frå FFB kalla sitt eige prosjekt på Kvam for elefanten i rommet.
– Ingen snakkar om det, og det er jo det einaste prosjektet som ikkje er ferdigstilt, sa Talleraas på konferansen, og la til at FFB er svært glade for initiativet frå næringslivet i Kvam om å setje kunstverket opp igjen.
Men på spørsmål frå NRK om det er uaktuelt for FFB å setje kunstverket opp ein annan stad i Kvam, var svaret klart:
–Ja, sånn som det er no, så er det det.