NAFs vinterråd til elbilistar

– Det var kaos, ja. Eg er overraska over at folk ikkje bytte om til vinterdekk tidlegare.

Det fortel Tor Pettersen. Han var ein av mange bilistar som opplevde snøkaoset på Austlandet på måndag.

Det var mellom anna fleire køyretøy med sommardekk som laga trøbbel for andre bilistar ved det første snøfallet i sesongen.

Enkelte stader vart bilistar ståande i kø i mange timar. Det vart etter kvart så ille at Røde Kors måtte kallast inn for å hjelpe.

Det var også ein del folk med elbilar som vart noko nervøse medan dei sat i lange køar.

Rekkjeviddeangst er nemleg ikkje eit nytt fenomen for ferske elbileigarar.

Dette bør elbilistar gjere vinterstid

– Alle bilistar burde eigentleg ha ein nødkoffert i bilen på vinterstid. Eit varmt pledd og kanskje nokre ekstra varme klede, seier seniorrådgivar i kommunikasjonsavdelinga i NAF, Nils Sødal.

Han ramsar opp ein haug med tips til kva elbilistar burde tenkje på vinterstid.

– Det kan vere lurt å ta med ein spade. Kjetting kan vere lurt å ha viss du skulle setje deg fast, og ei isskrape burde alle sjølvsagt ha, meiner Sødal.

Han legg til at varm drikke og litt ekstra mat er greitt å ha i bilen, særleg viss du skal over fjellet og det er risiko for kolonnekøyring. Eller viss ein skulle bli ståande og vente på bilbergar ein stad langs vegen.

– Betre å stanse og ringje bilbergar

Mange nye elbilistar kan kjenne på rekkjeviddeangst når kulda set inn. Batteriet varer ikkje like lenge som ein er vant til når kulda kjem.

Sødal seier at ein ikkje må ofre varmen i bilen for å presse fram nokon ekstra kilometer med rekkjevidd.

Men det er lurt å stoppe før ein går heilt tom.

– Viss du ser at du nærmar deg null, anten du står i kø eller om du køyrer, og du veit at du ikkje rekk neste ladar, så er det betre å stanse og ringje bilbergar. Det er betre å bli frakta til nærmaste ladar av bilbergar, avsluttar Sødal.