– Han ringde og sa kva han heitte. Så sa han at eg måtte ta med meg familien og komme meg ut, fordi han skulle setje fyr, seier Leibsland til NRK.
Det var ved 18-tida søndag kveld episoden fann stad på Lund i Kristiansand. Leibsland bur i ei leilegheit over ein butikk. Det var i butikken det brann.
Leibsland la frå seg telefonen og gjekk ut på gata for å sjå om mannen snakka sant.
– Fekk panikk
– Eg må innrømme at eg fekk panikk. Eg tenkte, er det mogleg å berre gjere slike ting. Eg tok skoa fatt og sprang rett ut. Når eg kom ut såg eg at det stemte det han sa, seier han.
Han sprang tilbake i leilegheita for å få ut kona og dottera. Deretter ringde dei brannvesenet.
– Brannvesenet var raskt på plass. Det tok ikkje mange minutt. Men det var ei forferdeleg oppleving. Det er slik du aldri tenker du skal oppleve. Men når det skjedde er eg jo glad at han ringde og sa ifrå om at han skulle setje fyr, seier han.
43-åring pågripen
Brannvesenet fekk melding om brannen i ein butikk på Lund i Kristiansand like etter klokka 18 søndag kveld. Kring ein halvtime seinare var brannen sløkt.
Brannstiftaren, som er ein 43 år gammal mann, er allereie arrestert.
– Han var i området då vi kom fram og vart pågripen, seier operasjonsleiar i Agder-politiet, Audun Eide til NRK.
Brannmeister Trond Busterud seier at brannvesenet raskt fekk kontroll over brannen.
– Vi sende inn røykdykkarar og fekk sløkt brannen med ein gang. Det gjekk eigentleg ganske raskt, seier han til NRK.
– No har vi lufta ut det vi kan, så tek vi ein etterkontroll, seier han.
Ni personar vart evakuert då det brann. Ingen personar skal ha blitt skada i brannen.