Meteorolog Tarjei Breiteig hos Agder Energi studerer kart på kontoret sitt i Kristiansand.
– Her ser vi isdekke. Dette er sjøisutbreiing i Arktis. Det ein kan slutte utifrå dette er at det er med på å påverke til å gi ein mildare og våtare vinter enn normalt, seier Breiteig til NRK.
Mykje solaktivitet
Jobben hans er å observere naturen. Prognosane til no syner at det kan bli mindre av snø som skapar kaos på vegane i vinter.
I arbeidet med å finne ut korleis vinteren blir brukar han sola, sjøtemperaturar og Arktis.
– Når det er mykje solaktivitet på toppane av grafane ser vi at det kjem hyppigare mildare og varmare vintrar, seier han.
For Agder Energi er vêrvarsel avgjerande for å kunne disponere kraftproduksjonen riktig.
Ser på fleire faktorar
– Det fortel at vi det er auka sannsyn for å få ein mild og våt vinter. Sannsynet er auka i forhold til i fjor. Då var sannsynet større for å få ein kald og tørr vinter basert på sju-åtte ulike ting ein kan sjå på, seier han.
Tidlegare i haust skreiv NRK.no om at straumleverandøren LOS ikkje ventar høge straumprisar i vinter.
– Det er ikkje berre vi i LOS som meiner dette. Det er generelt for bransjen. Det er ingen som meiner at prisen vil sprette opp på det nivået vi hadde for nokre år sidan, sa marknads- og kommunikasjonsansvarleg i LOS, Thorbjørn Laundal.