Den alvorlege hendinga skjedde torsdag ettermiddag, etter at mannen først var blitt bortvist frå ein kafé i Florø sentrum og køyrt heim av politiet.
Deretter reiste den rusa mannen tilbake til sentrum og tok seg inn på kontora til ein kommunal etat på Sunnfjord medisinske senter.
– Der oppførte han seg så trugande at vi blei nøydde for å ringe politiet, seier kommunalsjef for helse- og sosial i Flora kommune, Norunn Stave.
Ho stadfestar at mannen kom med fysiske trugslar mot personalet, og at situasjonen blei oppfatta som dramatisk.
Politiet kom etter kvart til staden og fekk kontroll på mannen. Han blei sett i arresten, og blei slept laus att seint torsdag kveld.
– Saka kjem til å bli etterforska vidare ved Flora politistasjon, opplyser Nils Erik Eggen ved Sogn og Fjordane politidistrikt.