Køyrde på steinar i vegen

Steinane la seg ein i kvart køyrefelt, og det skapte problem for fleire bilistar. Ein bil fekk materielle skadar etter å ha køyrt på ein av steinane.

Svein Rune Kyrkjebø køyrde til Høyanger i dag tidleg, og han fortel at det var vanskeleg å sjå steinane.

– Eg låg bak ein annan bil og såg at han hadde nokre uvanlege manøvrar. Han køyrde faktisk over den eine steinen som låg i vårt felt. Eg heldt og på å køyre over han og, forhan var ikkje så stor at han ruva i landskapet, men han gjekk i eitt med asfalten.

Likevel var det ikkje snakk om småstein, seier Kyrkjebø.

– Han var stor nok til at to mann ville hatt problem med å rulle han til side. Og steinen i det andre feltet var endå større, så bilane måtte køyre i sikksakk. Det kom litt bust på oss.

Rett etter kom ein annan bil som så vidt greidde å unngå å køyre på steinen i vegbana.

– Då fekk vi sett opp sperring og varsla Vegtrafikksentralen, så no er det nok folk undervegs for å rydde.

Vegen rydda, men geolog på veg

Roger Nedberge Hille trafikksentralen fortel at steinane no er fjerna.

– Vegen er open no, men det er snakk om at dei kanskje skal ha geolog på plass for å sjekke om det er fare for meir nedfall. I så fall kan det bli aktuelt å stenge vegen medan det arbeidet pågår.