Følg 600 sauer på spektakulær og strabasiøs tur til sommarbeite

Kvart år i juni fører dei 600 sauer frå Turtagrø til Guridalen i nærleiken av Skogadalsbøen. Turen inn går over Keisarpasset 1500 meter over havet, og er ein verkeleg styrkeprøve for både sauer og folk.

Buføringa må gjerast på natta medan snøen er hard nok til at dei kjem seg over.

Programansvarleg Terje Gilleshammer seier turen i år vart ekstra krevande.

• SJÅ PROGRAMMET HER:

  

– Imponert over innsatsen

– Buføringa inn skjedde ei varm helg i juni, og sjølv midt på natta var det fleire plussgrader 1000 meter over havet. Snøen var så roten at både folk og sauer seig ned for kvar steg dei tok. Eg må seie eg vart rett og slett imponert over den innsatsen og det slitet dei la ned denne helga.

Bakgrunnen for denne spesielle sauedrifta er at dei tidlegare hadde sauene på Sognefjellet og hadde store jervetap.

Opp mot 50 sauer vart drepne årleg. Til slutt fekk dei valet mellom å legge ned eller å finne på noko heilt nytt. Løysinga vart å flytte sauene inn i Hurrungane.

Greier å verne dyra mot jerv

Inne i Guridalen har dei funne ein stad der dei klarar å verne sauene mot jerven.

Dei høge fjella og store elvane har gjort at ein gjetar klarar å passe på sauene utan at dei forsvinn ut av dalen. Dette kombinert med bruken av ein stor gjetarhund har redusert sauetapa til eit minimum.

Men bak suksessen ligg det eit slit over fleire årstider. Allereie på vinteren må dei køyre inn provianten med snøskuter. Og gjetaren som passar på sauene går lange turar kvar einaste dag.

Berre sankinga tek to dagar der åtte personar bevegar seg i vifteform bortover dei bratte hamrane i Gjertvassdalen.

– Viktig å få fram slitet

Programansvarleg Terje Gilleshammer seier han var med å laga ein kort reportasje på desse bøndene i 2007. Sidan då har han tenkt på at ein burde følgje dei over ein heil beitesesong.

– Bruken av gjetar og gjetarhund blir ofte trekt fram som ei løysing på jerveproblema. Eg synest difor det er viktig å få fram alt slitet bak. Og så er det kjekt å få løfta fram slike kvardagsheltar som kjempar mot elementa på denne måten. Dei gir seg ikkje.