Denne kloakktransporten gjekk skitdårleg

Uhellet mellom Førde og Naustdal vart meldt i 0830-tida onsdag morgon.

På ein dag der fall av kram snø har ført til store trafikale utfordringar i Sogn og Fjordane.

• SJÅ: Oppdatert vegmeldingar frå NRK Trafikk

– Det er ein septikbil med hengar, som fekk sleng og containeren på hengaren kvelva. Den sperrar vegbana og det har leke ut ein god del septik frå tanken. Luka er no stengd, opplyser Synnøve Domben ved Sogn og Fjordane politidistrikt.

Klokka 14.30 var brannvesenet ferdige med å spyle vegbana på riksveg 5 etter uhellet med septikbilen. Vegen er no open for fri ferdsle.

(Artikkelen held fram under videoen)

Fløymde utover

Vegen vart delvis stengd etter uhellet, og småbilane vart slusa gjennom Naustdal sentrum, medan tungtrafikken vart dirigert forbi ulukkesstaden.

• SJÅ: Oppdatert vêrmelding frå yr.no

Ingen personar vart skadde i uhellet og både brann og politi er på staden. Tanken var halvfull med septik, og mellom åtte og ti kubikk rann ut og la seg i grøfta og vegbana.

Arild Tistel ved Førde bilberging meiner det skal vere ein grei jobb å få rydda staden, men understrekar at det vil ta tid.

– Vi har ringt etter kranbil som skal snu hengaren som ligg opp ned i vegbana og fått tak i ny bil som skal ta med seg containeren. Hengaren veg knapt fem tonn, så det går raskt å snu når kranen er på plass. Containeren er kring ti tonn, seier han.

(Artikkelen held fram under biletet)

Køyrde på «drit»

Skadestadsleiar, Torbjørn Thue, seier vogntoget har kome for langt ut i vegkanten før den fekk sleng.

Septikbilen var på veg i retning Førde og Sunnfjord Miljøverk sitt anlegg med avskilt slam. Eller på godt norsk «drit». Ingenting av lasta har hamna i elva som renn forbi.

– Han har truleg hatt litt høg fart på staden. Det er mykje slaps på vegbana og det snøar tett. Så vidt ut for kanten fått sleng, så har kassen som er full av avskilt slam lagt seg, seier Thue.

– Køyr roleg

10–15 brannmenn frå Førde og Naustdal, samt to frå politiet, er på staden. Kloakken er skuffa ut av vegbana, men ifølgje NRK sin reporter på staden er synet verken særskilt innbydande eller godluktande.

– No ventar vi på ein ny container som kan ta det som har rent ut. Det er ei tørr og ganske fin masse som har rent ut. Det kan fort gå eit par timar til før vi er ferdige, seier Bjørn Berge hos brannvesenet.

Trafikken blir dirigert manuelt, før vegen blir stengd att for spyling.

– Folk må tilpasse farten og køyre roleg, seier Thue.