Dei to brannane starta om lag samstundes natt til fredag for ei veke sidan.
– Vi har ikkje nokon grunn til å tru at det er noko samanheng. Det er nok reint tilfeldig at det var to brannar samstundes, seier kriminalteknikar Jan Bjarte Skrøppa ved Førde og Naustdal lensmannskontor.
- Les også:
Truleg elektrisk feil
Skrøppa seier at det ikkje er mistanke om at brannen i Gaular er påsett.
– Årsaka kan ha vore elektrisk feil frå bygget, eller på eit av køyretøya som stod inne i garasjen. Det kan vi ikkje seie sikkert. Brann i køyretøy som står parkert er slikt som skjer frå tid til anna, seier Skrøppa.
Kjell Magne Barsnes, politiførstebetjent i Flora, seier at brannen i Florø starta i eit køyretøy som stod på utsida av ein garasje.
– Strålevarmen gjorde at brannen spreidde seg til garasjen, seier han.
Ferdig å etterforske saka
Heller ikkje dei har greidd å finne ut korleis brannen oppstod.
– Køyretøyet er såpass utbrent, at det blir vanskeleg å fastsette brannårsaka. Vi har heller ikkje andre opplysningar i saka, som seier noko om kva som starta brannen, seier Barsnes.
Politiet i Flora reknar no saka som ferdig etterforska.