Ulukka skjedde utanfor Sogningen Storsenter. Politiet fekk meldinga klokka ti over elleve i dag.
– Ein MC og personbil har støytt saman, politi og ambulanse er no på staden, seier Per Rimmen ved operasjonssentralen i Florø.
Motorsykkelen er tyskregistrert. Då NRK var på staden fekk MC-føraren behandling av medisinsk personell i ambulansen.
Tilstanden til motorsyklisten er enno ikkje kjend, men politiet i Sogndal opplyser at han er sendt til Førde for behandling. På Twitter melder politiet at føraren har fått brotskadar.
– Ulukka skjedde då personbilen kryssa vegen framfor motorsykkelen, då han skulle svinge av Gravensteinsgata til området bak kjøpesenteret, opplyser politibetjent Britt Brugrand ved Sogndal lensmannskontor.
Føraren av personbilen, ein mann i 70-åra, er mistenkt for å ha brote vikeplikta.
– Førarkortet til sjåføren er mellombels kverrsett, seier ho.