Her er grønspetten i fullt «arbeid» att på kyrkja

Kyrkjetårnet vart i sommar reparert for 200 000 kroner, men verken ny kledning eller ein blå fugl-liknande figur skremde grønspetten frå å igjen setje nebbet i veggen.

I løpet av eit par haustdagar kom det to nye hol i kyrkjetårnet.

– Når vi har fiksa det meste av kyrkja, så er det fortvilande at hakkespetten i løpet av få dagar lagar ti centimeter store hol i panelet og inn mot rammeverket til tårnet, seier kyrkjeverje Per Christian Liseter.

Mangeårig problem

NRK fortalde i sommar om den trøblete grønspetten som over fleire år har herja med kyrkja på Ålhus . Tårnet vart demontert og i alt 25 hol reparert. Framleis står det att å tette eit par hol – i tillegg til to nye.

No får kyrkja felle inntil fem individ av den freda grønspetten. Informasjonskonsulent Magne Myklebust i Norsk Ornitologisk Forening beklagar.

• Sjå: Norsk Ornitologisk Forening sine råd mot hakkespett-problem

– Eg har forståing for at dei opplever dette som eit problem og eg set veldig pris på at dei har prøvd avbøtande tiltak, men det slår meg at ein kan finne ei løysing på problemet utan å skyte fuglane. Prøv vidare med ulike fargar på silhuettar av rovfugl, oppmodar han.

Har gjort tiltak

Foreininga har tidlegare klaga på liknande fellingsløyve, men det er førebels uvisst om dei vil klage på vedtaket til Jølster kommune.

• Les også: Hakkespett herjet med hytter

Tenesteleiar for næring og miljø i kommunen, Joar Helgheim, er usikker på om det er så mykje meir å gjere.

– Dei har reparert kyrkjetårnet i håp om at fuglen skulle misse interessa. Dei har også prøvd andre ting for å skremme fuglen derifrå, seier han og trur problemet vil halde fram om ein ikkje får gjort tiltak før vinteren.

Grønspetten oppsøkjer husveggar og liknande på vinterstid for å leite etter insekt som overvintrar i sprekkar.

– Det er ikkje noko ein ynskjer, men her er det ikkje mange alternativ i høve til kyrkja og tårnet, som også er ein stor verdi for bygda, seier Helgheim.

Vil ikkje ha tivoli

Så lenge tiltaka ikkje fungerer, vil hakkespetten halde fram «arbeidet» på kyrkja.

• Les også: Dette synet møtte fjøseieren

– Eg har prøvd å lese meg litt opp og har diskutert med andre med tanke på å montere lyd frå rovfuglar. Men kyrkja er ein stad ein skal gå i fred og ro, seier kyrkjeverje Liseter.

– Kva med silhuettar i ulike fargar?

– Det har vi ikkje gjort. Det er trass alt ei verneverdig kyrkje, og vi er ikkje ute etter å lage noko tivoli.

Liseter forsikrar at ein vil prøve avbøtande tiltak for å hindre tilsvarande problem for framtida. Kva tiltak er førebels uvisst.