Kompisgjeng i luksusbilar råkøyrde gjennom Sogn og Fjordane

Følgjet på minst ni bilar blei observert av folk langs dei populære turistvegane frå Sogn til Nordfjord. Ein av bilførarane, ein 45 år gamal, engelsk industridesignar, blei målt til 137 km/t i 80-sona på E39 tysdag kveld.

Mannen har no har vedteke ei bot på 15 000 kroner. Han er også pålagt køyreforbod. Den 45 år gamle mannen får ikkje lov til å køyre i Norge dei neste 22 månadane.

Han må også få andre til å køyre den rådyre sportsbilen Aston Martin V8 Vantage ut av Norge.

Råkøyrde

Det var tysdag ettermiddag i femtida at det byrje å hagle inn meldingar til politiet i Sogn og Fjordane.

Eit følge av minst ni sportsbilar skal ifølge politiet ha føreteke hasardiøse forbikøyringar på Rv. 5 i Sogndalsdalen, i ein kø som oppstod grunna asfaltlegging.

– Frå Sogndal og til der dei vart stogga fekk vi mange meldingar, den siste då dei var godt inne i Våtedalen, seier operasjonsleiar Ole Tom Nord.

Men på Facebook-sida til NRK Sogn og Fjordane fortel folk om endå meir råkøyring.

Eit ektepar i Erdal i Lærdal skriv at dei observerte sportsbilane på veg ned dalføret. Sportsbilane kan altså ha køyrt fjellvegen frå Aurland til Lærdal før dei svinga nordover.

I det utanlandske følget skal det ha vore bilar som Mercedes SL, Porsche, Lotus og Aston Martin, ifølge politiet.

Politiet til aksjon

Politiet organiserte seg etter alle meldingane om utlendingane si ville ferd gjennom Sogn og Fjordane.

– Vi hadde ein UP-patrulje på Byrkjelo, slik at vi hadde dei dekka om dei svinga mot Nordfjord. Så fekk vi ein bil frå Førde i posisjon i tilfelle dei svinga mot Sunnfjord, seier operasjonsleiar Nord.

Patruljen på Byrkjelo fekk fangst på tre målingar med laser. Patruljen frå Førde kom fram tidsnok til å legge seg bak følget. Det var dei som gjorde målinga på den engelske industridesignaren i 137 km/t.

– Likar fart

I tillegg til industridesignaren frå England, vart tre menn frå England, Belgia og Monaco fødd i 1958, 1959 og 1991 målt til 106, 107 og 111 kilometer i timen, og fekk forenkla førelegg.

Industridesignaren som fekk køyreforbod hadde ikkje anna forklaring til politiet om råkøyringa enn at han likar å køyre fort.

Bilane stod parkert nord i fylket tysdag kveld. Industridesignaren måtte bli med politiet til lensmannskontoret på Skei i Jølster. Aston Martin-bilen han køyrde stod der medan han gjorde opp med politiet.

Seinare på kvelden kom også denne bilen til staden der dei andre superbilane stod.