Marine Harvest varsla måndag denne veka Fiskeridirektoratet om at dei hadde oppdaga at ei ukjend mengde fisk hadde rømt frå eit anlegg i Solund.
– Rømminga vart oppdaga under ein inspeksjon på anlegget måndag, sa Eivind Nævdal-Bolstad som er kommunikasjonssjef i Marine Harvest til NRK.no tysdag.
- Les også:
Nævdal-Bolstad kan tidleg onsdag føremiddag ikkje seie noko om kor stort holet i nota på merden er, eller kva dette skuldast.
Det stod opphavleg 192.000 laks i merden, og det er til no attfiska 29 fiskar.
– Det er fisk att i merden, men vi må få telje opp desse før vi kan slå fast omfanget av rømminga.
Sju rømmingar på ni månader
– Når trur de at det kan ha skjedd?
– Dette er vi i gang med å undersøke no saman med Fiskeridirektoratet og leverandør. Hendingsgangen veit vi ikkje meir om per i dag, seier Nævdal-Bolstad.
Av 25 rømmingar rapportert til Fiskeridirektoratet i perioden 1. januar 2015 til 30. september 2015 var sju av dei hos Marine Harvest sine anlegg rundt om kring i landet.
Det verste tilfelle av desse sju var rømminga i Bremanger i slutten av april 2015. Då rømde 35.000 laks, og vel 950 vart gjenfanga av selskapet, ifølgje tala til Fiskeridirektoratet.
- Les også:
– Det er ulike hendingar som har gjort at det rømmer fisk. Vi har ein nullvisjon. Vi går gjennom kvar hending saman med Fiskeridirektoratet og leverandørar, for å finne årsak for å finne ut korleis vi kan unngå at rømming skjer, seier Nævdal-Bolstad.
500 kroner per fisk
For å avgrense skadane av rømminga er det sett i gang gjenfiske, og lokale fiskarar blir oppmoda om å bidra til utfiskinga.
– Vi betaler ein kompensasjon på 500 kroner per innleverte fisk frå anlegget, seier kommunikasjonsdirektøren.
- Les også: