Honndøler frykter veg blir kuppa

Vegen mellom Hornindal og Stranda er neste på lista over vegar som skal rustast opp etter Olden-Innvik. Men både Venstre, FrP og Ap varslar dei vil endre prioriteringslista etter valet.

– Eg blir rimeleg oppgitt over at det no blir snakk om å endre på dei prioriteringane som er gjort. Eg føler spesielt Arbeidarpartiet held oss for narr, seier ordførar Edvin Haugen.

Medan forkjemparane for 45-minuttsregionen mellom Måløy og Florø fossar framover, og partia kjempar om å love mest, blir ordføraren i Hornindal meir og meir uroa.

• LES OGSÅ: Senterpartiet skulda for vegbløff
• LES OGSÅ: «Slik bløffa dei veljarane»

Viktig veg for kommunen

Fylkesveg 60 mellom Hornindal og Møre grense er neste på prioriteringslista over fylkesvegar som skal rustast opp etter Olden-Innvik. No fryktar Haugen den skal bli skubba nedover.

– Dette er ein veg som er utruleg viktig for næringslivet og turistnæringa. Vi har Ekornes, Stabburet og oljetransport som går her dagleg. Ikkje minst i sommarhalvåret er det mange turistbussar som går i skytteltrafikk.

• LES OGSÅ: Sa ja til bompengar på ny kystveg
• LES OGSÅ: Skal ikkje råke andre prosjekt

Vil ikkje love noko

Både FrP, Ap og Venstre vil endre på prioriteringane. Ap sin fylkesordførarkandidat Åshild Kjelsnes vil ikkje gi konkrete løfter om opprusting av vegen i Hornindal.

– Prioriteringane ligg i dag fast, men eg kan ikkje forskottere ei rullering som skal skje om to år, seier ho.

– Då er det kanskje ikkje så rart at Haugen blir uroa?

– Det er vel naturleg for ein ordførar å vere uroleg for sine prosjekt, seier Kjelsnes.

• LES OGSÅ: Sa ja til bomring rundt Førde
• LES OGSÅ: Vil betale kystveg med bompengar

På 4. plass på FrP-lista

Men FrP sin fylkesordførarkandidat Frank Willy Djuvk er derimot klar. FrP skal bygge andre vegar før Hornindal-Møre grense, fordi den vegen ikkje er viktig nok.

– Vi ønskjer å ha Olden–Innvik på første plass, 45 minuttsregionen på andre plass og på tredje plass den fylkeskommunale delen av Førde-pakken. På fjerdeplass vil vi ha Hornindal–Møre grense. Vi må prioritere vegar ut frå kva vi har størst nytte av, seier han.