Fritz Hjelmeland er død

Fritz Hjelmeland var fødd på Hjelmeland i Gaular, og var saman med brørne Gunnar og Finn med på å byggje mykje av sentrum i Førde frå 1962 og utover. Han starta det året si eiga entreprenørforretning, 23 år gamal, etter m.a. å ha arbeidd som murar i USA.

Seinare bygde han Elvegården, og i 1996 Førde Torg saman med Torbjørn Berqvam. Desse vart seinare slegne saman til Elvetorget AS. Han var og hovudaksjonær i selskapet som eig Rica Sunnfjord Hotell.

Jonny Tjønn, som er dagleg leiar i Fritz Hjelmeland AS, stadfestar at Hjelmeland er død etter lengre tids sjukdom.

– Vi har vore førebudde på at det kom til å skje, men det er likevel tungt når det skjer, seier han.

Var svært mediesky

Fritz Hjelmeland var ein svært mediesky mann - det er mellom anna svært få foto av han utanom familien. Tjønn stadfestar at Hjelmeland ikkje var glad i offentlegheit.

– Han var ein veldig tilbaketrekt person, men han visste kva han ville og fekk det som regel til. Men som person var han veldig snill og raus med oss som jobba nær han.

– Respekt for det han fekk til

Peter Midtun, som no er administrerande direktør i Firda Billag, var dagleg leiar for Fritz Hjelmeland AS frå 2001 til 2009. Han seier dei jobba tett saman desse åtte åra.

– Eg har stor respekt for det Fritz Hjelmeland fekk til. Eg lærde mykje av han. Han har mellom anna gjort veldig mykje for den utviklinga Rica Sunnfjord Hotell har hatt.

Ifølgje firda.no døydde Hjelmeland natt til torsdag. Fritz Hjelmeland etterlet seg ei dotter og to barnebarn.