Det har vore ei svært god helg for dei lokale vekløftarane under Lag-NM i Naustdal i helga. Fredag tog Brodd sølv i ungdomsklassen. Laurdag vart ein andå betre dag. Tambarskjelvar sine juniorar tok suverent gull, herrene tok gull og det vart sølv i dameklassen.
Gull utan den beste på laget
Gunnar Reiakvam, trenar for vektløftarane i Tambarskjelvar, er svært godt nøgd med innsatsen.
– Eg er spesielt godt fornøgd med at vi greidde å vinne eliteklassen for herrar. Vi greidde dette utan vår beste løfter Vebjørn Varlid, som er skadd. I tillegg hadde vi to juniorar og guteløftar med på laget, seier Reiakvam.
Avviser dårleg nivå
– Gull med to juniorar og ein guteløftar. Tyder ikkje dette på at nivået må vere lågt?
– Nei, det vil eg ikkje seie. Nivået er slik det har vore og er på det jamne, seier han.
Kvinnelaget kjempa lenge om gullet, men måtte til slutt gje tapt for bergenslaget Bjørgvin. Hadde dei løfta fem kilo meir, ville Tambarskjelvar teke gullet i kvinneklassen.
– Vi har eit svært godt lag og eg ser lyst på framtida, seier Reiakvam.
Mest fornøgd av alle var Daniel Holstad. Han sette nemleg personeleg rekord i støt med 145 kilo, åtte kilo meir enn hans førre personlege rekord.