Fiskefeitt drep fuglar og forsøplar hamnebassenget

Utslepp av fiskefeitt har sett sinna i kok i Måløy.

– Vi har fått nok av at det blir sleppt ut fiskefeitt som forsøplar heile hamnebassenget. Feittet har i tre veker lagt seg som eit belegg langs heile strandlinja, spesielt på Ivahavet der det ligg 150 lystbåtar og der mange folk bur, seier Svoren.

Store kostnader

Han har sjølv båt i hamnebassenget, og er mildt sagt provosert over situasjonen. Skal ein få fjerna feittet frå båtane, må dei på land. Dei må spylast, vaskast og behandlast på nytt.

– Kostnaden vil kome på minst 5–6000 for kvar båt. Dette er rett og slett hærverk. Stanken i området er enorm, og blir mykje verre dersom det blir varmare vær, seier han.

Kritiserer politiet

Svoren påpeikar at utslepp av sildolje i hamnebassenget har vore eit problem kvar vår og sommar dei siste åra.

– Saka er meld til politiet ei rekkje gonger, utan at politiet bryr seg. No har vi bildemateriell som viser døde fuglar og tilgrisa standlinje og båtar. I og med at ingen i kommunen bryr seg, sender vi no brev til Miljøverndepartementet, Kystverket og Fylkesmannen, seier han.

Avviser kritikken

Lensmann i Vågsøy, Tormod Hvattum, avviser kritikken.

– I medhald av ureiningslova overlèt vi denne type saker til kommunen, seier han.

– Men er det ikkje ei sak for politiet dersom det er miljøkriminalitet?

– Det er i første omgang kommunen som skal handtere denne type saker.

– Svoren hevdar ureininga i hamnebassenget har skjedd i årevis. Kva er din kommentar til det?

– Ja, vi har kvart år fått inn meldingar om sildolje i hamnebassenget. Vi har etterforska to saker om luktforureing i området, men begge sakene vart lagde vekk, seier Hvattum.

– Beklageleg

Avdelingsleiar i Vågsøy kommune, Odd Henning Svoren, forstår veldig godt frustrasjonen over mykje fiskefeitt i Måløy hamn.

– Det heile er svært beklageleg, seier Svoren, utan å ville kommentere saka ytterlegare. Han viser vidare til brannsjef i kommunen, Kim Hjelle. Hjelle har så langt ikkje vore tilgjengeleg for kommentar.

Avviser lekkasje frå sildoljefabrikk

Arnt Ove Hoddevik ved Måløy Sildoljefabrikk avviser at fiskefeittet kjem frå deira fabrikk.

– Det har ikkje vore noko lekkasje frå fabrikken vår, så ureininga må kome frå andre, seier han.

– Frå kven då?

– Dette er etter alt å døme avrenning av fiskefeitt i samband med lossing av fisk frå fiskebåtar. Dette er ikkje sildolje, seier han.