Fire skadde i alvorleg trafikkulukke på E39

Eitt av køyrefelta er opna for vanleg manuell etter trafikkulukka som vart meldt klokka 0718. Ulukka skjedde i 60-sona ved Brulandssvingen. Fire personar vart sendt til Førde sentralsjukehus.

AMK ved Førde sentralsjukehus opplyser at ei kvinne i 60-åra er moderat skadd og ligg på intensivavdelinga. To menn, i 20- og 50-åra, er lettare skadd.

Det same gjeld ei kvinna i 20-åra som var førar av bilen som politiet meiner kom over i feil køyrebane. Førarkortet hennar er mellombels beslaglagt.

– Vi har fått beskjed om at ulukesgruppa til Statens vegvesen skal ut, og då blir det mest truleg heilt stengt att når dei kjem, seier vaktoperatør Ketil Molvær ved Vegtrafikksentralen i Lærdal.

– Alvorleg ulukke

Det er førebels uvisst korleis ulukka skjedde, men dei to bilane skal ha fått store materielle skader etter samanstøyten. Det var røykutvikling frå den eine bilen, men vaktleiar Frode Eide ved 110-sentralen seier dette ikkje utvikla seg fordi tenninga vart slått av.

Statens vegvesen si ulukkesgruppe blir kalla ut ved alvorlege ulukker. Det er uvisst når dei kjem for å gjennomføre sine undersøkingar.

– Vi har fått beskjed via AMK at det er ei alvorleg trafikkulukke, og då er det vanleg at ulukkesgruppa kjem på bana. Det er usikkert når dei kjem til staden, seier Molvær.

Har bedt om hjelp

Ved Sogn og Fjordane politidistrikt opplyser operasjonsleiar Bjarte Engevik at ulukkesgruppa til vegvesenet ikkje er operativ grunna ferie.

– Men vi har bedt om hjelp frå Statens vegvesen i samband med etterforskinga, seier han.

– Kvifor har de gjort det?

– Det har litt med kompetanse og utstyr til å gjennomføre målingar på staden. Når det er så mange impliserte og så mange skadde, så må vi etterforske ulukka.

Vegen var stengd

Han trur ikkje at vegen blir stengd som følgje av undersøkingane på ulukkesstaden.

– Men det er noko vi må ta når den tid kjem. Det er uvisst når målingane blir gjennomførde, seier Engevik.

Vegen var ein periode heilt stengd etter ulukka. Noko av trafikken vart sleppt forbi på gang- og sykkelvegen.