– Dei skal vere tronge, då er dei meir presise og lettare å stå på små fottak, fortel Vegard Aasen.
23-åringen frå Sogn er ein av mange som brukar fritida si på å buldre på store steinar. Ein klatretype utan tau.
– Det er ikkje så skummelt, ein er ikkje høgt over bakken og dett ein ned har ein ei matte som ein dett ned på, forsikrar Aasen.
Populært
– Buldresenteret i Trondheim var så fullt av folk som ville klatre at dei måtte seie nei til nye medlemar ei tid, fortel Aasen.
Også Lars Ole Gudvang i Noregs klatreforbund merkar ei auke for klatresporten.
– Då eg starta med dette for 20 år sidan var det berre eit titals aktive, no er det eit par hundre – og ikkje berre studentar, fortel han.
Klatring og buldring passar nemleg for alle, ung som gamal, jente som gut.
– Klatring er dessutan blitt kåra til den mest sexy sporten dei siste åra, det er jo ein motivasjon i seg sjølv, flirer Aasen
Noko for alle
Alt ein treng for å buldre er ein stor, tørr stein, eit par klatresko og ein kalkpose og ei matte som ligg på bakken i tilfelle ein dett ned.
Kameratane står rundt og heldt hendene i lufta som støtte for den som klatrar. Det er sosialt å buldre, dei motiverer og hjelper på kvarandre i å nå nye mål.
Men er det for alle?
Ja, det er det, smiler Aasen.
– Det er mange forskjellige nivå, men også ei halvtjukk førti år gamal dame med litt spenst og sterke fingre kan klare dette, legg Aasen til.