Kablar, elektronikk og mekaniske innretningar med tenkjelege og utenkjelege fasongar og funksjonar. Det heile hadde litt Reodor Felgen-preg då ingeniørstudentane i Førde før helga skulle vise kva dei var gode for.
– Dette er eit årleg arrangement der bachelorstudentane kan syne fram kva dei har arbeidd med dette semesteret, seier Joar Sande, høgskulelektor ved ingeniørutdanninga.
Trur dei blir attraktive
– Alle ingeniørutdanningar i Noreg har eit såkalla systememne der målet er å kombinere kunnskap frå dei ulike fagfelta i eit konkret prosjekt, fortel Sande.
Og det er tydeleg at studentane har vore vakne under førelesningane i etikk- og samfunnsansvar. For ingeniørstudentane har for alvor tatt innover seg dei store utfordringane verda står overfor.
– Dei vil bli attraktive på arbeidsmarknaden når dei er ferdig utdanna, seier Sande som representerer ei faggruppe som har fått oljenedturen langs kysten midt i fleisen.
Stort Kull
– Det er mange studentar her i år, og neste år blir det enda fleire, seier Joar Sande.
Det var 11 grupper som presenterte sitt arbeid torsdag. Nokre ville halde fram med prosjektet til bachelor-oppgåva, medan andre hadde nye prosjekt i emning.
Øving til bachelor-oppgåva
Føremålet er at studentane skal få øving i å jobbe med eit større tverrfagleg prosjekt, noko som er nyttig fram til bachelor-oppgåva til våren.
– Det ligg mange timar bak, seier Sande.
Han var tydeleg stolt av kva studentane hadde fått til.
– Målgruppa for desse føredraga er i hovudsak andre studentar, men det er også invitert yrkesfagelevar frå Øyrane og frå teknisk fagskule.