Odd sin talentfulle keeper, Sondre Rossbach, blir skjerma frå media før eliteserie-kampen mot Sogndal på sundag.
Klubben meiner at presset på 17-åringen er i ferd med å bli for stort. Frå å vere ukjent for dei fleste, så hamna han brått i medias søkelys.
Dag Eilev Fagermo, trenar i Odd.
Foto: Lars Tore Endresen / NRKBare den siste veka har Sondre Rossbach fått eit titalls meldingar og invitasjonar frå norske media. Det har fått trenar Dag-Eilev Fagermo til å reagere.
– Det har vore eit enormt mediatrykk på han, og han er berre 17 år.
Fagermo seier at det sjølvsagt er moro med mediainteressa, og at Rossbach må få sole seg litt i glansen etter å ha debutert i tippeligaen og gjort det bra.
– Nå har det vore to veker med eit kjempetrykk, og han er sliten. Det er trass alt kampane og treningane som er viktigast, seier Fagermo.
Keepertrening med pappa
Difor har Fagermo bestemt at Sondre Rossbach skal få ro denne veka.
17-åringen har no fullt fokus på oppgåvene i Odd. Det betyr keepertrening av pappa Einar Rossbach. Den tidlegare landslagskeeperen er ein viktig støttespelar.
– Det er ein ny situasjon, seier Rossbach.
Einar Rossbach, keepertrenar i Odd.
Foto: Tom Ole Buaas / NRKDet er ikkje det same som å vere med som andrekeeper, og kanskje bli hivd innpå i kampen.
– No veit han at han skal spele, og det krev andre mentale førebuingar, seier Rossbach.
Trenar Dag Eilev Fagermo seier at Sondre Rossbach er priviligert som har ein tidlegare landslagskeeper som far og trenar.
– Det er derfor han er så god, seier Fagermo.
Han meiner det har vore viktig for Sondre Rossbach at faren har den erfaringa og interessa til å følgje opp.
Odd-fri sone i heimen
Men sjølv om far og son jobbar tett i Odd, så snakkar dei ikkje om Odd og keepertrening heime. Der er det for lenge sidan innført Odd-fri sone.
– Skal det fungere må vi ha det slik. Nå er vi på jobb her og heime så er vi far og son, seier Rossbach.
– Er det ikkje lov å snakke fotball?
– Jo, men då kan vi snakke om Manchester United og Leeds, og ikkje om Odd, seier Rossbach.
