Sjekkar laksefiskarane minst ein gong i veka

– Hallo! Eg skulle gjerne fått kontrollert fiskekort og betalt fiskeavgift.

Eigil Movik, fiskeoppsyn og miljørådgjevar i Skien kommune, går i land frå oppsynsbåten for å sjekke at dei som fiskar laks ved Klosterfossen har betalt det dei skal. Og dei aller fleste har alle papir i orden.

450 grunneigarar, kommunen og Grenland Sportsfiskere samarbeider om fiskeoppsynet. Minst ein gong i veka er dei ute og sjekkar både betaling og utstyret som blir bruka.

Les også:

• Drog i land laks på 22,5 kilo
• Her er den første laksen på 17 år
• – Urovekkende dårlig start på laksefisket

Fiskeavgifta går til kultiveringsarbeid

– Håpet er at me skal tilbake til gamle lakseeventyr, seier grunneigar og styremedlem i Skienselvas Elveeierlag, Ina Grubbe.

Ho legg til at dei aller fleste skjønnar det, og betalar for å drive med hobbyen sin. For få år sidan kom det berre inn nokre få tusen kroner i fiskeavgift, i fjor kom det inn over 70 000 kroner. Alt går tilbake til elva i form av laksesmolt som blir utplassert.

300 kilo laks så langt i sesongen

Målet er å få 8–12 tonn opp elva kvart år, men dei er førebels langt ifrå det målet. Men kultiveringsarbeidet gjev resultat, og smolten som er sett ut gjer at mange fiskarar får fangst.

Grunneigarar frå Bliva og Skotfoss i nord/vest til Torsbergodden i Porsgrunn og sportsfiskarlag samarbeider om å koordinere tiltak. Blant anna er det etablert både smoltanlegg, og fleire vaskeanlegg som skal hindre at lakseparasitt spreier seg i elva.

Dei godt vaksne mannfolka er i stort fleirtal, men også ein del yngre menn kosar seg med fiskestonga i Skienselva.