Det er det russiske nyheitsbyrået Interfax som melder dette, og siterer kjelder i generalstaben.
Årsaka til dette er, etter det Interfax kjenner til, det landet oppfattar som ei endring i den amerikanske utanrikspolitikken, også når det gjeld rakettskjoldet, som den nye administrasjonen i Washington står for.
Les også:
Russland har trua med å utplassere rakettar i Kaliningrad, ein russisk enklave trengt inn mellom Litauen og Polen ved Austersjøen, som svar på dei amerikanske planane om eit rakettskjold.
- Vi har stansa arbeidet med å utplassere desse rakettane i samband med at den amerikanske administrasjonen ikkje køyrer på for å etablere eit rakettskjoldsystem i Aust-Europa, seier den anonyme kjelda i den russiske generalstaben.
Planane om eit amerikansk rakettskjold i Aust-Europa har vore med på å forsure forholdet mellom USA og Russland. Dette nye russiske utspelet blir sett på som eit russisk forsøk på å betre forholdet mellom dei to landa no når Barack Obama har teke over som president.
- Om dette blir offisielt stadfesta av Kreml, er dette eit positivt steg, seier USAs NATo-ambassadør Kurt Volker i ein kommentar.
USA har heile tida sagt at rakettskjoldet ikkje er retta mot Russland, men som eit forsvar mot angrep frå land som Iran og Nord-Korea.
Russland har ikkje trudd på dei amerikanske forsikringane, og har sett på rakettskjoldet som ein direkte trussel mot landet.