– Vi veit at det går veldig kort tid frå dyra døyr til dei er borte. Det går raskt før det ikkje er mogleg å fastslå dødsårsak. Hundane vil bli ein uvurderleg ressurs, seier viltforvaltar hos fylkesmannen i Vest-Agder, Tor Punsvik til NRK.no.
Hundretusenvis av sauer og lam blir slept på beite om våren. Fleire tusen kjem ikkje tilbake frå sommarbeite. No kan hundar gjere det enklare for ekspertane å finne ut om dyra har blitt drepne av rovdyr, sjukdom eller av andre årsaker.
Nytt i Norge
– Formålet er at vi ynskjer å få betre innsyn i tap av bufé i utmark. Vi har gjennom mange går erkjent at ein alt for liten del av sau og lam, som blir borte i beitesesongen som blir funne og gjort greie for, seier Punsvik.
– Dette ynskjer både vi og næring å gjere noko med. Vi veit at tapsforholda er komplekse. Vi har sjukdom, ulykker og periodevis rovviltproblematikk, seier han.
Bruk av kadaverhundar er relativt nytt i Norge. Men resultata så langt har vore positive. I Rondane Nasjonalpark har funnprosenten auka frå under 10 prosent til opp mot 30 prosent.
– Resultata har vore usedvanleg gode så langt, seier leiar av foreininga for Norske Kadaverhundar, Johnny Mathisen.
Større utbetalingar
Berre i Vest-Agder vart det utbetalt i overkant av 300 000 kroner i erstatning for rovviltsakder. Viltforvaltaren ser føre seg at talet vil stige ytterlegare når ein får betre oversikt over kva som gjer at dyra går tapt på sommarbeite.
– Slik det er i dag kan ein ofte oppleve det som Lotto for å få erstatning. For du må ha dokumentasjon i området rundt deg. Dei som ikkje har det, men som har store tap kan føle det som urettferdig og får ikkje utbetaling i dag, seier Punsvik.
– Det vil i alle fall ikkje medføre redusert utbetaling. Dersom vi får avdekt meir tapsforhold som også kan skuldast andre ting vil næringa ha moglegheit til å førebyggje dei på ein betre måte, seier han.
Vil ha hjelp
I april skal fylkesmannen i Vest-Agder arrangere eit informasjonsmøte om bruk av kadaverhundar. Til hausten vil det bli arrangert sertifiseringskurs.
– Vi søkjer kontakt med alle som kan ha interesse av hundearbeid og som likar å gå i skog og mark. Vi er ute etter hundefolk som kan tenkje seg å gjere noko meiningsfylt, seier viltforvaltaren.
Punsvik påpeikar også at nær sagt alle hundar kan bli kadaverhundar.
– Dette er noko dei fleste rasar vil kunne trenast opp til, seier han.