På søndag skulle Viking-spelarane for første gong i år få kamptrening på grasmatta deira på Viking stadion mot Rosenborg.
1,4 meter tele
Men i dag skriv klubben på heimesidene sine at dei framleis ikkje har fått banen klar.
– Det er tele 1,4 meter ned i bakken. Så sjølv med varme og ein svær duk, er det umogeleg å spela treningskampen mot Rosenborg, seier Gisle Oseberg som er driftssjef i klubben.
Han innrømmer at det var i seinaste laget å slå på undervarmen i graset tre veker før kampen, men legg til at det er svært kostbart med undervarme.
Ulempe for begge lag
Viking-trenar Kjell Jonevret er ikkje nøgd med meldinga.
– Me har alttid greidd å få til kamp på gras her i Stavanger tidlegare. Eg er ingen grasmann, men eg håper at dei som steller med dette har gjort alt dei kan for å få det til, seier han.
Nå er sundagens kamp flytta fire mil lenger sør, til stadionanlegget Nye Loen på Nærbø. Ein bane Jonevret ikkje har eit forhold til.
– Eg har aldri vore der, seier han kort.
Jonevret meiner at det er ei ulempe for både Rosenborg og Viking, at dei ikkje får spela sin siste treningskamp på eit skikkeleg stadionanlegg. Kva det vil få å sei for Viking si opning mot Molde kan han likevel ikkje sei.
Trur banen vil vera klar for opning
Gisle Oseberg kjenner seg trygg på at banen skal bli klar til opninga av eliteserien 15. mars.
Og om den ikkje skulle vera det, kan han forsikra om at denne kampen ikkje skal bli spelt på Nærbø.
– Skulle banen framleis ikkje vera klar, så må me avlysa. Men det tvilar eg på blir aktuelt, seier han.
Avspark for treningskampen i Nye Loen på sundag blir klokka 17.45.