Dei tilsette i P5 fekk den triste nyheita onsdag.
I Stavanger er to av dei tre redaksjonelle medarbeidarane oppsagde med tilbod om sluttpakke. I Trondheim må alle dei tre redaksjonelle medarbeidarane gå.
Sendingane i Bergen og Oslo består.
Økonomiske årsaker
Bakgrunnen for nedskjeringane er økonomiske årsaker, ikkje svake lyttartal. Den siste tida har vore prega av annonsesvikt og raude tal i P5 i Stavanger og Trondheim.
– Det er veldig trist at det blir slutt på lokalsendingane, seier programleiar Kjartan Kopren i P5 i Stavanger.
Trass i at det blir slutt på lokalsendingane, vil dei lokale nyheitene halda fram. Det blir også framleis lokal musikk. Dette gjeld òg i Trondheim.
– Eit tap for mange
I P5 i Trondheim er det slutt på lokale sendingar frå torsdag av. Når lokalsendingane i Stavanger blir avvikla er ikkje kjent. Men det er venta å skje innan kort tid.
– Lyttarane går glipp av gode lokalsendingar. Det blir eit tap for mange, seier klubbleiar Øystein Windstad.
P5 held fram med å ha sendingar på riksnettet frå Oslo eller Bergen.
P5 er lokalradiokanalane til P4 som gjekk på lufta 1. januar 2010. P5 har hatt sendingar frå Oslo, Bergen, Trondheim og Stavanger.
Kanalsjef i P5, Kenneth Andresen, presiserer at lyttarar både i Stavanger og Trondheim framleis vil kunne høyre sendingar med lokalt innhald.
– Men det meste av programinnhaldet vil bli laga sentralt. Dei lokale nyheitene vil likevel bestå i Stavanger, understrekar han overfor NRK.no.
