Store politistyrkar rykka ut i dag tidleg då ein bil forfølgde og køyrde inn i ein annan bil ved flyplassen på Sola.
Det var personane i bilen som blei forfølgd som melde frå til politiet klokka 05.17 om at dei ikkje torde å stoppa.
Ifølgje politiet kan det sjå ut som om det dreier seg om eit oppgjer mellom norske og tsjetsjenske ungdommar.
Dei tre tsjetsjenarane i den eine bilen var mellom 16 og 17 år og er nå tatt med til politistasjonen. Ungdommane i den andre bilen var litt eldre.
Politiet trur ikkje hendinga er tilfeldig.
– Det verkar som det heile starta med ein krangel på ein fest på Jæren. Dei har forfølgd kvarandre i bilar, og enda opp på Sola, seier Ivar Riveland, vaktleiar ved Stavanger politistasjon.
Fredag føremiddag blei dei tre tsjetsjenske ungdommane sett fri frå arresten. Dei blir avhøyrde over helga.
