– Dette er hardare enn maraton

Sjølv om han har halde på lenge, har han dårleg tid. Den profesjonelle saueklypparen frå Bjerkreim reiser frå gard til gard, for å få nok trening.

– Eg har klypt kvar dag nå sidan 10. januar, og i dag skal eg klyppa 130 sauar. Før ville eg tenkt at det var mykje, men nå bryr eg meg ingenting. Eg klypper berre ein og ein sau, seier Rolf Gravdal.

• Les òg: Saueklipperne vil til OL
• Sjå i Nett TV: Norge rundt innslag om VM i saueklypping 2008

Klar for VM

Treninga han nå ligg i er svært viktig. Neste veke er det duka for verdsmeisterskap i saueklypping i New Zealand, og nervane er under kontroll:

– Eg er aldri nervøs før slike ting. Det er berre ei stor oppleving å få vera med på, seier mannen som snart skal tevla med norsk flag på brystet på andre sida av verda.

– Kva er det som må til for å få ei god plassering?

– Du må vera gira, det er det viktigaste. Konkurranseinstinktet ditt må vera så bra at du ikkje toler å tapa i Ludo, sjølv tapar eg aldri i Ludo, seier Gravdal og ler.

• Les òg: Sauevennlig kjenningsmelodi

Han bruke ned mot 40 sekund på eitt dyr. Den regjerande noregsmeisteren klarer gjerne 35.000 sauer i året, noko det blir toppidrett av.

– Større atletar enn maratonløparar

– Saueklypparar er nokon av dei største atletane som finst. Klypper du 400 sauer på ein dag, er det å rekna som eit maraton. Skilnaden er at ein saueklyppar kan gjera dette kvar dag i fleire veker. Det klarar ikkje ein som spring maraton, seier Gravdal.

Sjølv om han tidlegare har vunne noregsmeisterskap har ikkje Gravdal ambisjonar om topplassering i New Zealand.

– Det viktigaste er å ha det kjekt, og trivast med det ein gjer.

– Blir det litt mykje sau av og til?

– Det kan bli litt mykje, ja. Tidlegare drøymde eg om sau, men det har eg slutta med. Det er nok ei sjuke, men det gjer ingenting.