Familien Ana Kvavic, Damir Delic og dottera Verona Delic får lov av ankeutvalet i Høgsteretten å legge fram saka si for Høgsterett for å prøve bruken av utlendingslova mot barnekonvensjonen.
Familiens advokat, Håkon Bodahl-Johansen, er glad for at Høgsterett gav lov til å behandle saka.
– Det er godt at Høgsterett nå skal vurdere Utlendingsnemda sitt vedtak om å ikkje gje Verona og foreldrene opphald på humanitært grunnlag. Og eg håpar det endar med at vedtaket blir omgjort, seier Bodahl-Johansen.
Barn på flukt
Familien Delic blei sendt ut av landet i mars i år etter å ha budd på Rjukan sidan 2003. Verona Delic har budd heile livet sitt på Rjukan og det skapte sterke reaksjonar i lokalsamfunnet at familien blei kasta ut avlandet og sendt til Bosnia.
Familien har ei eiga støttegruppe på Rjukan som har håpa på at Høgstrett ville behandle saka.
- Vi håpar at den nye stortingsmeldinga "Barn på flukt" vil påverke utfallet, sa Ruth Dahl i støttegruppa til NRK.
Budde lenge i landet
I meldinga skal det bli tatt meir omsyn til kor lenge barn har budd her i landet når utlendingsnemnda gjer vedtak.
Håkon Bodahl-Johansen seier at advokatforeningens aksjons og prosedyregruppe meiner dette er ei prinsippiell sak.
– Verona, som denne saka gjeld, har budd så lenge i Noreg. Og har ei så sterk tilknyting til landet, at advokatforeningen meiner det er urovekkande at Utlendingsnemnda ikkje la vekt på det, seier Bodahl-Johansen.
Godt nytt for støttegruppa
Sanja Pasovic i støttegruppa i Tinn seier at anken er godt nytt for støttegruppa.
– Det at saka no blir prøva for Høgsterett vil bety veldig mykje for andre barn som er i same situasjon.
Pasovic seier det blir spennande å vente på utfallet av saka i Høgsterett.
– Det viser at vi kan bruke rettsvesenet, sjølv om politikarane står på sine prinsipper, seier Pasovic.
Kan kome tilbake
Bodahl-Johansen meiner det er i familien si interesse at Høgsterett vurderer vedtaket om avslag på opphaldsløyve, sjølv familien ikkje lenger bur i Noreg.
– Dersom Høgsterett kjem til at vedtaket ikkje er rett, så kan familien kome tilbake Rjukan.