Politiet fekk melding om trafikkulukka klokka 08.21 onsdag morgon.
– Det har vore ein samanstøyt mellom ein personbil og ein lastebil, seier operasjonsleiar Per Rimmen ved Sogn og Fjordane politidistrikt.
Ulukka skal ha skjedd på Svelgensida av Eikelandstunnelen.
Det var ein person i kvar av bilane og den mannlege føraren av personbilen skal vere skadd. Vedkommande skal vere oppegåande og tilsnakkande, men politiet kan ikkje seie noko meir om skadeomfanget. Politiet opplyser at mannen i 40-åra er frakta til Sentralsjukehuset i Førde med luftambulanse.
AMK ved Førde sentralsjukehus opplyser like før klokka 12 at den 47-år gamle mannen er moderat skadd og ligg på intensivavdelinga.
Føraren av lastebilen skal så langt politiet veit vere uskadd.
Fylkesveg 614 er sperra på staden. Klokka 09.55 opplyser politiet av bilberging er på veg. Vegen vart opna att rundt klokka 11.
Bremanger lensmannskontor etterforska ulukka. Politiet kan førebels ikkje seie noko om årsaka.
Ambulanse, luftambulanse, brannvesenet og politi vart alle sende ut til ulukkesstaden.