Ein polsk semitrailer problem på veg ned Hemsedalsfjellet og saksa seg ved Borlaugkrysset.
– Det er ein høvesvis ny lastebil, registrert i april 2011. Då handlar det ikkje om vedlikehaldet, men ein mekanisk svakheit på bremsene, seier kontrollør Torgeir Bang ved Statens vegvesen.
Mista bremsene
Vegvesenet har i ettermiddag kontrollert vogntoget og bremsene. Konklusjonen er at uhellet kunne skjedd kven som helst – både norske og utanlandske vogntog.
På veg ned frå fjellet mot Lærdal, var semitraileren utom vegen på begge sider av vegen, før den til slutt hamna i grøfta på E16. Føraren har forklart at det var ei utriveleg oppleving.
– Han mista bremsene gradvis på veg nedover fjellet, og til slutt vart det ille. Men han klarte å halde farten så låg at han hadde kontroll nedover alle bakkane og gjennom dei skarpe svingane, seier Bang og rosar føraren.
Førar får ros
– Det kan truleg vere ei form for varmkøyring av bremsene, men føraren gjorde så godt han kunne. Og han gjorde det ganske bra, seier han.
Føraren var åleine i bilen. Ingen vart skadd i utforkøyringa. Føraren har no fått beskjed om å køyre til næraste verkstad for å reparere feilen.
Bang er klar på at føraren ikkje kan klandrast for uhellet.
– Køyretyet var lovleg lasta, og lasta var sikra godt. Den står framleis etter uhellet. Føraren har vore fornuftig og gjort jobben heile vegen, seier Bang.