Buss braste gjennom vegg

– Det må ha vore noko teknisk med bussen som gjorde til at han ikkje stoppa, seier dagleg leiar ved Firda Billag, Peter Midthun.

Bussen var på veg inn i buss-garasjen som ligg like ved rutebilstasjonen i Førde sentrum. Men då sjåføren skulle stoppe bussen, var det ikkje råd å bremse ned farten.

Tok fyr ganske fort

Truleg har gasspedalen på køyretøyet hengt seg opp. Idet bussen kolliderte med betongsøyla inne i garasjen, tok det til å brenne i fronten på bussen.

– Det stemmer at det var eit branntilløp, men det klarte vi å sløkkje ganske raskt, seier Midthun.

(Artikkelen held fram under biletet)

Køyrde rett i søyle

Dermed heldt køyretøyet fram rett fram, kolliderte med ei søyle før han pressa ut noko av veggen.

– Dette er trist, det er store øydleggingar både på bygningsmassen og på bussen. Men til alt hell har ingen personar komme til skade, Midthun.

Han legg til at dei gjerne skulle vore uhellet forutan.

– Men skjedd er skjedd, seier Midthun.

Politiet er varsla om hendinga og Arbeidstilsynet vil bli informert.

Bygget vil no bli stiva av for å vere sikker på at ikkje resten av bygninga rasar i hop.