Ein floraværing i slutten av 40-åra er sikta for brot på tollova. I midten mars kom politiet over store mengder smuglarvarer i bustaden til mannen.
- Mistanken mot mannen kom etter ein aksjon som politiet og tollvesenet gjorde i Bergen tidlegare i vinter. Vi mistenkjer at han medverka til det som skjedde der nede, seier etterforskingsleiar Jan Bjarte Skrøppa ved Flora politistasjon.
- Organisert
Beslaget i Hordaland er truleg på om lag same storleik som beslaget i Florø. Skrøppa presiserer at han ikkje kjenner detaljane i beslaget i Bergen.
Politiet mistenkjer også at mannen skal ha drive vidaresal av brennevin. Dei utelukkar ikkje at fleire kan bli involverte i saka, og mistenkjer at verksemda har vore organisert.
- Vi kan ikkje utelukke at fleire kan komme i søkjelyset. Ut frå mengda, så er det ting som tyder på at det er folk som har drive litt større, seier han.
- Lovleg handel
Ifølgje politiet skal mannen ha erkjent delvis straffskuld for siktelsen. Han sat varetektsfengsla i 14 dagar etter pågripinga. Forsvararen til mannen, Stig Nybø, ynskjer ikkje å gå i detalj på forklaringa til den sikta mannen.
- Min klient erkjenner å ha hatt alkohol i heimen, men seier han har skaffa den på lovleg vis. At han skal ha drive vidaresal er heilt ukjent for han, seier Nybø.
Saka er framleis under etterforsking ved Flora politistasjon.