Ei rekkje jegrar har i helga jakta ferske gaupespor i Lærdalsdalen, men rovdyret låg heile tida i forkant av jegrane.
– Gaupa har stålkontroll på natta, seier Rein Arne Golf i Statens Naturoppsyn til Sogn Avis.
Mobiliserte
Jegrane var raskt i aksjon etter at det vart observert gaupe over Seltatunnelen i Lærdalsdalen fredag. Dei følgde spora og kom over restane av to rådyr og ein hjort, skriv avisa.
Eit av kadavera låg tett inntil busetnaden i Borgund.
Spor fleire stader
Finn Olav Myren i det interkommunale jaktlaget i fylket fortel til Sogn Avis at jegrane hadde los på gaupa frå laurdag ettermiddag til langt ut på natta, men utan å lykkast.
Det er sett spor etter gaupe fleire stader i Lærdal. Golf i naturoppsynet trur det kan vere snakk om same dyret.
– Dei går over veldig store område på kort tid, seier han.