Talent 2008 har fått UNESCO-tittelen «Young artist for intercultural dialogue between the Arab and Western worlds» . Det skriv Førdefestivalen i ei pressemelding.
Tittelen er ein heider til unge artistar for arbeidet deira for å fremje dialogen mellom arabisk og vestleg kultur.
Innovativt prosjekt
Naustdalsjenta Ingrid Stuhaug var ein av tre norske musikarar i Talent 2008. Prosjektet er eit samarbeid mellom Førdefestivalen og Rikskonsertane med stønad frå Utanriksdepartementet. Prosjektet har blitt arrangert kvart år sidan 1995.
I grunngjevinga for prisen står det at Talent 2008 er eit innovativt prosjekt og eit døme på framifrå arbeid for å auke felles forståing og kulturell utveksling gjennom musikk.
I 2008 var deltakarane i Talent frå Noreg, Egypt og Palestina, og møttest både under Førdefestivalen og året etter i Egypt.
– Ei stor ære
Ein av musikarane som var med frå Norge i 2008, var felespelaren Ingrid Stuhaug frå Naustdal. Ho vart veldig glad da ho fekk høyre om tittelen:
– Dette var utruleg kjekt. Eg vart veldig overraska då eg fekk meldinga. Eg er stolt, sjølvsagt, og det blir veldig kjekt å reise til Paris og motta prisen – og ikkje minst møte igjen alle i prosjektet, seier Stuhaug og legg til:
– Vi hadde eit utruleg flott samarbeid med ungdommane frå Palestina og Egypt. Ein av songane vi spelte inn i Kairo har rundt 20000 avspelingar! Det tyder på at også andre synest samarbeidet vårt er vellukka.
UNESCO-tittelen vert delt ut på Unesco sitt hovudkontor i Paris 13. april.