Bonde Jakob Øygard vil ikkje lenge leve med frykta for at Fortunelva kan flaume over kvar gong det kjem mykje regn.
- Det er skremmande. Ikkje minst når ein har små ungar.
Barna vart skremde
Dei frykta det verste då store ismengder losna under Harbarsbreen øvst i Fortundalen i Luster i går. Vassføringa i Fortunelva auka dramatisk, og 40-50 hus vart varsla om mogeleg evakuering.
- Det var verst for ungane. Dei vart skremde, og ville vekk frå garden fortast mogeleg, seier Øygard.
Er utrygg når det regnar mykje
Dei frykta marerittet ville gjenta seg. I fjor fekk familien Øygard store skader på eigedomen då ei flaumstor Fortunelv råka gardstunet.
- No må det skje noko. Alt er så utrygt, vi veit ikkje når det blir mykje regn som aukar faren for flaum, seier Øygard.
- Senk botnen
Øygard krev at elvebotnen no blir senka. I tillegg vil han ha hindringar ved elvebreiddane, slik at ho ikkje flaumer over dyrka mark igjen.
- Det er ikkje godt å leve med skrekken kvar gong det regnar mykje. Og særleg viktig er det for å sikre hus og eigedom, slik at vi ikkje opplever nye skader i framtida, seier Øygard.