Kommunen vil ikkje gjere noko med saka før 2014.
– Får vi ein brann i eit av høgbygga vår, så slit vi, seier brannsjef Øberg.
– Nærast satt på bakken
Ein ny rapport viser at brannvesenet i den største byen i Sogn og Fjordane manglar livsviktig utstyr. Stigane på brannbilane er nemleg ikkje lengre enn at dei når opp til 3. etasje.
Brannsjef i Førde Bernhard Øberg meiner ein ikkje har tatt omsyn til brannfare i iveren etter å bygge opp Førde som by, og seier at i verste fall kan liv gå tapt.
– Vi blir nærast sett på bakken når brannen går oppover i høgda på bygningar på fire-seks etasjar.
Pliktar å ha sikkert brannvesen
Direktoratet for Samfunnssikkerhet og Beredskap er staten sin pådrivar for å forebygge ulukker. Avdelingsleiar, Hans Christian Madsen, seier kommunen pliktar å oppretthalde eit sikkert brannvesen.
– Det ansvaret til kommunen å planlegge både kvar risikoen er lokalt og korleis møte denne.
– Skulen kunne vore redda
Brannsjef Bernhard Øberg trur at til dømes Gamleskulen i Førde som brann ned i 2003, kunne ha blitt redda dersom dei hadde hatt ein høgare stige. Øberg meiner brannvesenet i kommunen til ein viss grad fungerer optimalt.
– Vi er iallefall veldig gode opptil tredje etasje.
Ordførar Nils Gjerland har ikkje hatt høve til å uttale seg i denne saka.