Russejenta som er elev ved Sogndal vidaregåande skule, vart innlagt på Førde sentralsjukehus natt til søndag.
Kan føre til hjernebetennelse
I dag kom prøvesvara som var positive.
– Det viser seg at det er ein sannsynleg vekst av meningokokk-bakteriar i prøven frå blodet. Det er for tidleg å seie noko om kvar undertype det er. Generelt er det slik at meningokokk anten gir blodforgiftning, hjernehinnebetennelse eller ein blanding, seier overlege i mikrobiologi ved Førde sentralsjukehus, Reidar Hjetland.
Tilstanden til jenta vert rekna som alvorleg, men stabil.
– Kontakt lege viss du får symptom
Rektor Martha Sofie Vange fortel at det er iverksett tiltak i den næraste familien, og at elevane skal fylgje med om dei utviklar særskilde symptom.
– Vi har gått ut med informasjon om at viss elevar får feber, utslett eller føler seg uvel, så skal dei kontakte lege eller helsesyster.
- Er det aktuelt å halde russen vekke frå skulen?
- Nei, det er ikkje aktuelt no. Vi følgjer dei råda vi får frå kommunelegen.
Meningokokksmitte har råka fleire russ dei siste vekene, særleg i Oslo-området der russen har blitt oppmoda om å vere forsiktige.